Мыйын шочмо-кушмо йӧратыме Эҥерсола ялем XVII курымыштак Морко кундемын ик эн сылне мландешыже верланен. Тыште ожно шем чодыра гӱжлен шоген, Шыраган эҥер шыргыктен йоген, куп лийын. Вӱд воктен Актай лӱман пӧръеҥ суртым чоҥен. Ты купым варажым «Актас куп» манаш тӱҥалыныт. Мландым куралын-ӱдышӧ айдемылан тыгай вер путырак келшен. Марий-влак, чодырам руэн, пундышым куклен, тыште у илемым чоҥеныт. Нуно эҥерыште колым кученыт, янлыкым, кайыквусым сонарленыт, мӱкшым, вольыкым онченыт, шурным куштеныт.
Тачат Эҥерсола чаплана, тӱзлана. 3 августышто ял пайрем эртаралтын. Шочмо веремлан 255 ий темын. Чапле пайремыш шуко уна, пошкудо, родо-тукым-влак погыненыт. Нуным икевереш погаш манын, Т.В.Гаврилова чот тыршен. Пайремым сӧрастараш Эҥерсола школын тунемшыже-влакат полшеныт. Нуно Кӱчыкэҥер ял клуб пеленысе «Изи шӱдыр» йоча ансамбльыш коштыт. Ӱдыр-рвезе-влак мурат, куштат, тӱрлӧ марий семӱзгар дене шоктат. Ансамбльым И.В.Кутузова вуйлата. Семӱзгаржым Эҥерсолан тале мастар айдемыже П.П.Эчейкин ыштен коден. Пётр Павлович шке жапыштыже ятыр йочам семӱзгар дене шокташ туныктен. Тудын тӱҥалын кодымо пашажым кызытат умбакыже шуят. Эҥерсола школын ик уста тунемшыже, почеламутым лудмо дене ятыр конкурсышто ойыртемалтше Мария Николаева В.Осипов-Ярчан «Ит вурсо чал профессор» сылнымутшым шергылтарен. Изи ӱдырым Эҥерсола школын директоржо, марий йылмым туныктышо Н.В.Анисимова ямдылен.
Эҥерсолаште кумдан палыме ятыр еҥ шочын-кушкын, кундемжым чапландарен. Самырык тукым, нуным ончен, сеҥымашке шуаш тырша. Шочмо вержын лӱмжым кӱшнӧ куча.
Ксения БУТЕНИНА.
Морко район.
