Кужэҥер районысо Тумья изи эҥер серыште кок уреман мотор Кугу Тумньымучаш ял верланен. Коҥганур школышто 6-шо классыште тунемше Ангелина Ершова шочмо кундемжым моткоч йӧрата. Ӱдырлан чылажат шерге: емыжлан, поҥгылан поян чодыраже, пеледыш дене темше олыкшо, тамле вӱдан памашыже. Но Ангелина эн йӧратыме верлан ял воктенысе тошто тумым шотла. Тушко йолташыже-влак, Вова шольыж дене (снимкыште) чӱчкыдын канаш коштыт.
– Кеҥежым тумо, лопка укшыжым шаралтен, чевер кечыйол деч ӱмылыштыжӧ шылта. Шыжым нарынчалгыше, йошкаргыше лышташлаж дене куандара. Телым ече дене мунчалташ шке йырже калыкым пога. Шошым нарашта лышташнерже дене пӱртӱс ылыжмым шижтара. Мыланем ты пушеҥге моло деч ойыртемалтшын, эн виян да эн моторын чучеш, – ойла Ангелина.
Йоча-влак, а те шочмо кундемыштыда эн мотор верлан мом шотледа? Шоналтыза да тудын нерген серышым возен колтыза.
Оля МАЙКОВА.
Фото-влакым еш архив гыч налме.
