Башкортостан Республик Мишкан район Лепешкан ялысе клуб пелен «Ош пеледыш» ансамбль пашам ышта. Тудым В.С.Яниева ик ий ончыч чумырен. Ансамбльыш куд ӱдыр коштеш. Нуно Ардаш школын 5-7-ше класслажым тунем пытареныт.
– Пашаш толмеке, районысо смотрлан куштымашым шындаш йодыныт. Ӱдыр-влак дене номерым ямдылыме деч вара ансамбльым чумырымо нерген шонымаш шочын. Ансамбльлан лӱмым йоча-шамыч шке шоненыт, – ойла Вероника Станиславовна. – Ӱдыр-шамычым тӱрлӧ вере илыше марий-влакын тӱвырашт дене палдарем. Вес калыкын ойыртемжым эскерена.
Марий вургемым чиен шогалмеке, ӱдыр-влак чынжымак ош пеледышыш савырнат. Лывыргылыкышт, усталыкышт дене калык чоным савырат. Российысе калык-влакын тӱвыра поянлыкышт идалыклан пӧлеклалтше «Наследие» районысо конкурсышто мастарлыкышт дене куандареныт.
В.С.Яниева марий йылмым аралыме, йӱлам, тӱвырам палдарыме шонымаш дене пашам ышта. Садланак репертуарыштым эре пойдараш тырша.
