Школыштына «Страна детства» йоча театр пашам ышта. Тудым А.В.Иванова вуйлата. Ме «Эн сай школ театр» районысо конкурсышто кокымшо ий почела вийнам тергенна. Тений Анна Сердоликын «Счастье для Тимоши» пьесыж почеш шындыме спектакльым модын ончыктенна. «Мы – команда» номинацийыште кумшо верым налынна. Могай куан! Мый Маска Потапыч рольым модынам. Йолташем-влак Мераҥ, Пире, Каза рольым келыштареныт.
Тиде спектакльым школ пеленысе йочасадыш коштшо шольо-шӱжар-шамычат куанен онченыт. Ме кызыт вес спектакльым ямдылаш тӱҥалынна. Изи ньога-влак деке уэш каена. Нуно мемнам вучат.
Дмитрий СМИРНОВ.
Морко, Кожлаер.
Фотом школ архив гыч налме.
