20 мартыште тӱнямбалне Йоча театр кече палемдалтын. Марий кундемнан рӱдолаштыже вич театр уло. Йоча-влак Республикысе курчак театр ден Марий самырык театрыш кошташ поснак йӧратат. Тушто нунылан келыштарыме спектакльым чӱчкыдынрак ончыктат. Икшыве-шамыч шкеныштым актёр семын сценыште терген ончынешт гын, тидланже республикысе ятыр школ але тӱвыра пӧрт пелен кружок, ушем-влак пашам ыштат.
Теве Йошкар-Оласе Бауман лицей «РЫЖИЙ КОТ» школ театрже дене чаплана. Тудо 2022 ий гыч пашам ышта, да 26 талантан икшывым шке йырже чумыра. Репертуарыштышт кум спектакль уло: «Баранкин, будь человеком», «Невозможное – возможно», «Два клёна».
– Школ пеленысе театр почылтмеке, икымше кече гычак тушко ушненам. Икмыняр постановкышто модам. Тӱҥ ролят логалеш. Теве «Баранкин, будь человеком» спектакльыште Баранкинын рольжым ӱшаненыт. Мыланем сценыште модаш моткоч келша. Адакшым актёр семын вияҥмем йылмым лывырташ полша, вес еҥ дене кылым ышташ туныкта, –ойла театрын ик чолга участникше Иван Софронов.
– Лицейым шке коклаштына «Доброград» шкешотан ола манын лӱмдена. Тудо йоча ушем семын 1994 ийыште почылтын. Кажне ийын ме «олаште» у илыше-влакым вашлийына. Школысо театрыш коштшо йоча-влак ты пашаште пеш кугу полышым пуат. Икымше классыш толшо шольо-шӱжар-шамычлан чапле пайремым эртарат. Оланан символжо – тул тӱсан пырыс. Садланак театрлан тыгай лӱмым пуэнна, – палдара школ театрын вуйлатышыже Н.А.Головунина.
Шукерте огыл «РЫЖИЙ КОТ» школ театр «Школьная классика» проектыш ушнен да федерал йыжыҥыште таҥасаш тӱҥалеш. Ӱдыр-рвезе-влак «Подвиг человеческий» темым ойырен налыныт. В.Распутинын ойлымашыже негызеш «Уроки французского» спектакльым ямдылат. Ты пашам нуно Б.Щукин лӱмеш театр институтын экспертше-шамычлан аклаш колтат. «РЫЖИЙ КОТ» театрын участникше-влаклан ончыкыжымат чолга лияш да кугу кӱкшытыш шуаш тыланена.
О.МОШКИНА-МАЙКОВА.
Фото-влакым школ театрын
