«Кажне кечын ик-кок шагатым спортлан ойырет гын, тазалыкет пеҥгыдемеш, чолга, лӱддымӧ, виян лият», – ойла Марий Турек школын 9-ше классыштыже тунемше Надя Иштуганова. Тудо спортлан изинек шӱман. Ачаж ден Сергей изажын кажне эрдене куржталмыштым ужын, пырляшке ушнаш тӱҥалын. Тыге икмыняр жап гыч ик сеҥымаш почеш весе ешаралтын.
– Кокымшо классыште тунеммем годым куштылго атлетике дене таҥасымашке икымше гана миенам. Сеҥыше радамыш логалынам: шӱмем лектын вочшашла кырен, чурий кече гае шыргыжын, – ойла Надя.
Кызыт чолга спортсменкын ятыр грамот ден дипломжо, медальже-влак погыненыт. Надя сеҥымашыш шумыжлан ачажлан, Валерий Алексеевичлан, таушта. Тудо Марий Турек школышто физкультур урокым вӱден. Чолга ӱдыр школысо волейбол командыште модаш жапым утларак ойыра. Районышто, республикыште эртаралтше таҥасымашлаште вийыштым тергат, сеҥымашке шуыт.
