Республикысе марий тӱвыра рӱдер «Самырык тукым» республикысе йоча усталык конкурсым марий йылме, тӱвыра деке изинек шӱмаҥдыме шонымаш дене ий гыч ийыш эртара. Тений пайрем Педагогын да наставникын идалыкыштлан пӧлеклалтын. Районысо йыжыҥыште сеҥыш лекше-влак 30 мартыште Йошкар-Олаште Республикысе курчак театрыште усталыкыштым ончыктеныт. Ӱдыр-рвезе-шамыч «Куштымаш», «Муро», «Театр», «Сылнымут» таҥаслаште мастарлыкыштым тергеныт.
Йоча-влакын легендым, преданийым шымлымышт да тудым сценыште модын ончыктымышт куандареныт. Икшыве-шамыч шочмо калыкын илыш ойыртемжым умылаш, калык ой дене келшен илаш, икте-весым пагалаш тунемыт. Онар, Канай, Чакчоран курык да моло нерген легендым пален налаш кажнылан оҥай лийын. Теве Шернур район Марисола школын тунемшыже-влак Акпарс нерген преданийым модын ончыктеныт да «Театр» таҥасыште икымше верым сеҥен налыныт. Ты школынак тунемшыже Глеб Ибраев эн устан модшо семын палемдалтын. Вуйлатышышт – марий йылмым да литературым туныктышо С.М.Максимова.
