Картинг нерген колмеке, шукынжо рвезылан келшыше спорт манын шоналтат. Уке, автоспортын ты видше дене ӱдыр-влакат кылым кучат. Медведево район Знаменский школын 5-ше классыштыже тунемше Ульяна Полушина изи ораван, лапка машина дене кумшо ий кудалыштеш. Спорт деке ӱдырым ачаже Алексей Александрович шӱмаҥден. Тудо тӱрлӧ ой-каҥаш дене полша гын, Медведево районысо Йоча усталык пӧртын тренерже А.В.Головенкин технике шотышто мутым куча, таҥасымашлан ямдыла.
– Ульяна машина дене изинек модаш йӧратен. Индеш ияшыж годым картингыш намиенам. Шке профессионал омыл гынат, Ульяналан кузе кудалме нерген умылтаренам да рульым пуэнам, – палдара ӱдырын ачаже А.А.Полушин.
Кызыт Ульяна арняште кум-ныл гана машина дене кудалыштеш. Писылыкшым, тӱткылыкшым вияҥда. Таҥасымашлаште вий-куатшым терга. Шукерте огыл эртаралтше «Золотая осень» республикысе таҥасымаште икымше верыш лектын.
– Картинг – писын шонаш таратыше спорт. Кудалме годым тӱрлӧ манёврым жапыштыже ыштен шуктыман. Корно шуко шӧрынан, сандене тӱткӧ лийман. Писын кудалме годым адреналин кӱза. Мый ончыкыжымат автоспорт дене кылым кучынем. У сеҥымашыш шуаш шонем, – ойла Ульяна.
