«У ий дене!» этнооткрытке республикысе конкурсышко ятыр паша пурен. Ӱдыр-рвезе-влак Йӱштӧ Кугызам, Лумӱдырым, у идалыкын озажым, ме-раҥым, ӧршым, кожым да молымат сӱретленыт. Марий тӱр дене сылнын сӧрастареныт. 6-9 ияш-влак коклаште Звенигово оласе «Светлячок» йочасад гыч Егор Соловьев сеҥышыш лектын. 1-ше номеран Шернур школын тунемшыже Денис Якимов 10-12 ияш-шамыч коклаште ойыртемалтын. Уста рвезе дене «Весела У ий пайремыште» вашлийна.
– Ме авам Надежда Николаевна дене пырля йошкар пижым ямдыленна. Марий калыклан порылыкым, тазалыкым, сеҥымашым тыланенам. Тошто ийым порын ужатен, чыла йӧсылыкым шеҥгелан коден, у ийышке ӱшанлын вончышт, – ойла Денис.
