Ик почеламутымак тӱрлӧ семын лудаш да умылаш лиеш. Мутлан, икте тидым тыматлын, йӱкым кугемдыде ышта, весе кычкыра, кидшым утыждене лупшкедылеш, кумшо сылнымутым шке семынже койдара. Йоча почеламутым тӱҥ шонымашым умылыде каласкален кертеш.
Икшывылан сылнымутым моторын, чонеш логалшын лудаш кугыеҥ полшышаш. Конкурслан ямдылалтме годым тидым поснак шотыш налман.
- Почеламутым ойырен моштыман. Мо нерген ойлалтмым йоча куштылгын умылышаш. Ийготым шотыш налман. Изирак-влаклан куштылгыракым, кӱчыкым ойырыман. Тунемшын койыш шоктышыжым эскерыман. Тыматле икшывылан утыждене весела почеламутым тунемаш да калык ончылно каласкалаш неле лиеш.
- Кугыеҥ почеламутым эн ончыч шке лудын ончыктышаш.
- Почеламутым пырля лончылыман. Кажне корным шергалман. Лекше йодышым рашемдыман.
- Сылнымутын кумылжым шижман. Шӱлыканым эркынрак, веселам писынрак лудман. Шӱргывылышым модыктымаш, кид дене ончыктымаш авторын шонымашыжым колыштшо деке намиен шукташ полшен кертыт. Но утыждене модман огыл.
- Логический ударенийым шындаш тунемман. Иктаж ойым палемденак кодынеда гын, йӱкым кугемдыман. Умбакыже 1-3 секундлан чарналтышым ышташ лиеш, утыждене огеш кӱл.
Оля МАЙКОВА ямдылен.
