Марий сылнымутлан негызым пыштыше Сергей Чавайным 6 октябрьыште порын шарналтышна. Морко районысо Чавайнурышто верланыше Чавайн лӱмеш сылнымут да этнографий комплексыште «Чавайн лудмаш» конкурсым эртарышна. Пайрем серызын шарныктышыж воктеке пеледышым пыштымаш гыч тӱҥале. Шӱргыял школышто тунемше-шамыч Сергей Григорьевич нерген каласкалышт, почеламутым лудыч, мурым мурышт.
Номинацийым да ийготым шотыш налын, тӱрлӧ пӧлемыште ӱдыр-рвезе-шамычын мастарлыкыштым аклышна. Мый йочасадыш коштшо да 7-11 ияш марте лудшо-влак дене лийым. Йоча-шамыч куандарышт: сайын, ару марий йылме дене почеламутым лудыч. Моло аклыше-влакат тидымак палемдышт. Прозо номинацийыште поснак виян лудшо-шамыч таҥасышт. Жюри председатель Анна Васильевна Якушева нуным Морко калык театрыш ӱжӧ.
Ты гана Елизавета Иванова (3-шо номеран Морко йочасад), Ульяна Герасимова (Волаксола школ), Кира Иванова (6-шо но меран Морко школ), Максим Пименов, Ксения Дмитриева (1-ше номеран Морко школ) поснак ойыртемалтыч да икымше верым сеҥен нальыч. Тунемше ден туныктышо-шамычын паша лектышышт куандарыше лие.
Галина СОШИНА,
М.Казаков лӱмеш тоштер вуйлатыше.
Авторын фотожо.
