Марий сылнымутышто у автор-влак кажне ийын гаяк палдырнат. Морко район Шале Кӱчыкэҥер ялын шочшыжо Виктория МАТВЕЕВАН лӱмжӧ пытартыш жапыште чӱчкыдын йоҥга. Самырык ӱдыр Морко посёлкысо эмлымверыште анестезиолог-реаниматологлан, эндоскопистлан пашам ышта. Тыгодым поэзийлан шӱман.
– Виктория, почеламутым возаш кузе кумылаҥынат?
– Врачлан тунем лекмеке да шочмо районышко пӧртылмеке, шочмо кундем да калык возаш таратеныт. Еҥ-влак кокласе кылым, кызытсе илышым, тӱняште мо ышталтмым, пӱртӱсын вашталтмыжым эскерен, почеламутым сераш кумыл лектеш.
– Икмыняр ий ончыч ик интервьюшто тыге кокытеланен ойленат: «Поэзий шӱлыш мыланем жаплан гына пуалтын, але чылажат тӱ-ҥалтыш веле?» Кызыт тидын шотышто кузе шонет?
– Кажне шомакын вийже уло. Тудым моштен кучылтман. Мут-влакым радамлен, почеламутым шочыкташ йӧратем. Садлан поэзий чонышкем курымешлан шыҥен. Кызыт сылнымут мыланем – илыш эҥертыш. Мыланем тудын яндарлыкше, моторлыкшо моткоч келшат.
– Тый илыш дене тӧр ошкылат. Аудио, видео полшымо дене почеламутет-влак дене палдарет.
– Тиде йӧным пытартыш жапыште кучылташ тӱҥалынам. Мут, сем да йӱк шкешотан шижмашым шочыктат, шонымашым келгемдат.
– Тый врач улат. Кузе шонет: почеламут – шкешотан эмлызе?
– Эше могай! Мый шкежат коклан тыге эмлалтам. Шарнем, Валентина Изилянован почеламутшым икымше гана лудмо годым чонемым ойыртемалтше кумыл авалтен ыле.
– Юнкор-влаклан тыланымашет могай лиеш?
– Шочмо йылме – эн кугу поянлыкна. Тудым шижаш тунемза, шымлыза, йӧратыза. Марла кутырен гына, вашла сайынрак умылаш тӱҥалына.
