Кызыт библиотеке книгам аралыше пӧрт гына огыл, тудо шкешотан тӱвыра, шанче рӱдер. Книгагудым моштен вуйлатет гын, лудшо эре лиеш, омса нигунам огеш петырне. Кужэҥер район Салтакъял библиотекыште йоча ден кугыеҥ-влак гӱжлат, книга-шамыч огыт «кане».
Книгагудышто изирак тоштер пашам ышта. Тушто 80 утла калык арвер уло: шондык, кӱнчылавондо, понар, ургымо машина, утюг, самовар да молат.
– Ондакысе библиотекарь Нина Аркадь-евна Курочкина калык арвер-влакым погаш тӱҥалын. Мый тудын пашажым умбакыже шуем. Кызыт краеведений пашалан кугу тӱткышым ойырена. Марий калыкын тӱвыражым, йӱлажым арален кодаш манын тыршена, – ойла книгагудо вуйлатыше Н.Ю.ПЕТУХОВА.
Библиотекыште йочасадыш коштшо, школышто тунемше да кугыеҥ-влак дене вашлиймашым эртарат. Тунемше-шамыч ИКН уроклан книгагудыш толыт. Библиотекысе тоштерын пайдаже кугу. Тудо патриот шӱлышан икшывым кушташ полша. Тыгодым книгам йӧраташ туныкта.
Надежда Юрьевна шымлымаш пашалан кугу верым ойыра. Изижымат-кугужымат уша. Йоча-влаклан «Родничок» кружок пашам ышта. Икшыве-влак шочмо кундемын моторлыкшым ужын мошташ, тудын историйжым шымлаш тунемыт. Салтакъялеш шочын-кушшо уста еҥ-влаклан пӧлеклалтше «Ими гордится село» проектым возеныт.
Кугыеҥ-влакын полшымышт дене «Шарнаш кодшо кыша» альбомым чумыреныт. «Лесной» совхозын пашаже, Кугу Ачамланде сар гыч пӧртылшӧ салтак, сарын участникше да тылын труженикше-влак нерген шуко пален налыныт. Школын выпускникше-влаклан пӧлеклалтше стендым сӧрастареныт. Школ илыш, пионер организаций нерген альбомышт уло. Шнуй вер-влакымат шымленыт.
Книгагудо пандемий годым калык дене дистанционно пашам ыштен. Викториным, йоча сӱрет ончерым, краеведений тоштерышке экскурсийым, книга обзорым онлайн эртареныт. Тӱрлӧ акцийышке ушненыт. Лудшо-влак келшыше книгам, журналым телефон дене йодыныт. Н.Ю.Петухова кевытеш коден.
«Тендан шонымаште, кызытсе книгагудо могай лийшаш?» – йодым Надежда Юрьевна деч. Тудо тыге вашештыш:
– Библиотеке тӱҥ сомылжо деч кораҥшаш огыл. Лудшын кумылжым савыраш манын, чыла йӧным кучылтшаш улына. Тӱҥжӧ: у да калыклан келшыше книга-влак лийшаш улыт.
