Йоча книга юзо шӱлышан. Тудо моторын сӧрастарыме комжо денак лудшым шкеж деке шӱмаҥда. А тушто аралалтше произведений-шамыч ӱдыр-рвезе-влаклан уждымо тӱням почыт, у йолташ дене палымым ыштат да порылан туныктат. Уста писатель О.В.Кузнецован «Когда папа рядом» савыктыме пашаже лач тыгай.
27 февральыште Республикысе йоча да самырык-влаклан В.Колумб лӱмеш книгагудышто Йошкар-Оласе 9-ше да 23-шо номеран, Знаменский посёлкысо школлаште тунемше-шамычын автор дене вашлийын мутланаш йӧнышт лийын. Ольга Валерьевна «Книжная палитра народов» I теле лудмаш фестиваль кышкарыште у книгаж дене палымым ыштен.
– Марий книга издательстве дене пырля пеш сылне книгам савыктыме. Тудо ойыртемалтше. Лаштыклашкыже QR-кодым вераҥдыме. Йоча телефон камержым лишемда гын, сӱрет-влак «ылыжыт». Жап дене тӧр ошкылмаш, у технологий-шамычым кучылтмаш самырык-влакым лудаш кумылаҥдат. Весела ойлымаш-шамычын геройлаж дене пырля йоча лекше нелылыкым сеҥаш, ончыко ӱшан дене каяш тунемеш, – ойла серызе.
Савыктыме деч ончыч книга пеш кужу корным эрта. Редактор терга, корректор йоҥылышым кычалеш, сӱретче лаштык влакым сӧрастара, дизайнер возымым да сӱретым кӱлеш верыш вераҥда, типографий пашаеҥ-шамыч печатьыш колтат, машинам виктарыше кевытлаш, книгагудылаш шупшыкта… Тыге икмыняр тылзе, эсогыл ий эртат. Ты увер йоча-влакым моткоч ӧрыктарен. «Когда папа рядом» книгасе сюжетын рӱдыжлан мо возын? Тидымат тунемше-шамыч рашемдаш тыршеныт.
– Чылажат илыш гыч налалтеш. Мутлан, вуймутлан кучылтмо «Когда папа рядом» ойлымаш эргымын йоча жапшым ушештара. Тунеммемлан кӧра ныл ияш икшывем ачаж дене коктын тылзе иленыт. Мӧҥгӧ пӧртылмекем, муным жаритлаш шогалын. Мый ала кидшым йӱлалта манын лӱдынам. А тудо укем шеҥгеч кажне кечын шке кочкаш ямдылен улмаш, – воштылеш О.В.Кузнецова.
Книга презентаций – «Книжная палитра народов» фестивальын ик эн сылне мероприятийже.
– Ты пайрем йӱлаш савырна манын ӱшанем. Шошымат, кеҥежымат, шыжымат эртаралтшашак. Тек йоча да самырык-влакым лудаш кумылаҥдыше мероприятийла ешаралтыт, книга-шамыч чӱчкыдын савыкталтыт, – палемден Марий Эл Республикын тӱвыра, печать да калык-влакын пашашт шотышто министрын алмаштышыже Николай Любимов.
Оля МАЙКОВА.
Авторын фотожо.
