«Артек» тӱнямбал йоча рӱдерын «Морской» лагерьже гыч шокшо саламым колтем. Кызыт «Твори Добро» волонтёр смене эртаралтеш. Тышке логалаш куштылго лийын огыл. Волонтёр пашам мыняр ий да кузе шуктымынам, могай курсым эртымынам, видео дене шке нерген палдарымынам да, эн тӱҥжӧ, тӱням сай могырыш вашталтен кертше социальный проектнам акленыт. 14-17 ияш ӱдыр-рвезе-влак деч 4487 йодмаш пурен. Тышеч 25 эн сай пашам ойыреныт. Ты радамыш Марий Эл гыч мый да Волжск оласе 9-ше номеран школ гыч Виктория Молчанова(снимкыште) логалынна. Лагерьыште яра жапна йӧршеш уке. Ме проект менеджментым, тактический медициным келгын тунемына. Отрядна дене Ливадий посёлкысо санаторный школ-интернатыште «Наследники Победы» мастер-классым эртаренна. Ончылно мемнам шуко оҥай вашлиймаш, мероприятий, социальный проектнам аралымаш вучат. Тышке логалмем шинчымашем пеҥгыдемдаш, тӱням сылнештараш полша, шонем.
Полина ЩЕГОЛЕВА.
Марий Турек школ.
Авторын фотожо.
