Самырык тукымын мастарлыкшым ончаш эре оҥай. Медведево район Цибикнур школышто лиймына годымат «Весёлые ложки» йоча ансамбльын совла дене шоктен мурымыжо моткоч куандарыш. Коллективым Т.В.Копысова 2023 ийыште чумырен. Тушко 8 йоча коштеш.
– Икшыве-шамыч дене марий, руш калык мурым, Медведево вел такмак-влакым, сӱан мурым тунемына. Школышто але ялыште концертым эртарыме годым калык куанен вашлиеш. Ончыкыжым репертуарыш марий мурымаш-куштымашым шукырак пурташ шонена. Усталыкым вияҥдымеке, фестивальлашке лекташ кумыл уло, – ойла ансамбльым вуйлатыше Татьяна Вячеславовна.
Йоча-влак музыклан шӱман кушкыт. Ешартыш шинчымашымат налаш тыршат. Шочмо йылмын сылнылыкшым, тӱвыран, сымыктышын поянлыкшым умылен кушкыт. Тидыже эн чот куандара да ӱшаным пуа.
З.ТИМОФЕЕВА.
