Ожнысо илыш-йӱла тачысе деч мо дене ойыртемалтеш? Курым ончыч калыкнам могай шонымаш тургыжландарен? Тӱвыраште вашталтыш лийын мо? Татарстан Республик Мамадыш район Черкешал ялыште илыше Юлия Сергеева тиде да ятыр вес йодышлан вашмутым сылны мутышто кычалеш.
– Эртык нерген историй предмет гоч кумданрак пален налына гынат, еҥ-влакын шонымашыштым, чон шижмашыштым, койыш-шоктышыштым умылаш литератур полша. Шукерте огыл Сергей Чавайнын «Акпатыр» драмыжым лудынам. Тӱҥ геройын шочмо мландыжым аралымыже, калыкше верч тыршымыже марий талешке дене кугешнаш таратеныт, – ойла ӱдыр.
Марий литературым да шочмо йылмым йӧраташ туныктышыжо Надежда Михайловна Филиппова кумылаҥден. Юлия Гришкин тӱҥ школышто 8-ше классыште тунемеш. Тений марий литератур дене шинчымашыжым 9-ше классыште тунемше-влак кокласе олимпиадыште терген. Сай лектышым ончыктен да регион-влак кокласе олимпиадыш ушнен.
Шуко шочшан Бахметовмыт ешыште (снимкыште) Юлия – эн изи ӱдыр. Николай Дмитриевич ден Эльза Анатольевна вич икшывым ончен куштеныт. Леонард, Кирилл, Алиса ден Даша кугурак улыт, Юлия – ача-ава пелен.
– Авай – чолга озавате. Шке жапыштыже врачлан тунем лектын. Ачай – уста плотник. Ялыште ятыр суртым чоҥаш полшен, – кугешна Юлия. – Кирилл ден Даша студент улыт. Ледик (ешыште Леонардым тыге маныт) ден Алиса ешым чумыреныт. Кертмышт семын канышлан шочмо суртыш вашкат. Чылан рӱж погынымо тат мыланем моткоч келша.
Оля МОШКИНА.
Фотом еш архив гыч налме.
