Ныл йолан йолташдан шочмо кечыже кунам, паледа? Шукын тидын нерген огытат шоналте, очыни. А теве Медведево район Руэм посёлко гыч Ксения Самокаева йӧратыме Ириска пырысшым кажне ийын ты сылне пайрем дене саламла.
— 28 мартыште — мыйын шочмо кечем, а эрлашыжым — пырысемын. Тудлан ныл ий. Ты кечын ешыште чылан тудым саламлена, эн тамле кочкыш дене сийлена. Мый Ирискам моткоч йӧратем. Ева шӱжарем, Анастасия акам да Рома изамат тудын дене куанен модыт, — ойла ӱдыр.
Ксения 4-ше классыш каяш ямдылалтеш. Школышто технологий, физкультур, математике предмет-влакым йӧрата. Моторын сӱретла. Магнит, брелок коллекцийлам пога.
