Арня еда кажне кугарнян лектын шогышо «Ямде лий» газет тӱрлӧ йыжыҥым эртен. Изданий тачат юнкор-влакым кушта да ятыр йочан йӧратыме газетшылан шотлалтеш. Савыктыш шуко темым авалта. Туддене пайдаланен веле моштыман. Лудшо-влаклан кажне ийын оҥай конкурс-шамычым эртарена. Сеҥыше-влакым диплом да пӧлек дене палемдена.
«Ямде лий» – марла йоча газет. Тудым кажне икшыве палышаш. Шочмо йылмын сылнылыкшым, поянлыкшым нӧргӧ тукым изинек умылен кушшаш. Тидлан школышто веле огыл, ешыштат кумылаҥдыман. Теве Провой кундем Выльыпсолаште илыше Николаевмыт еш «Ямде лийым» кажне арнян куанен лудеш. Самырык ава, Екатерина Сергеева, газетысе увер-влаклан тӱткышым ойыра. Кокымшо лаштыкыште савыктыме «Мама и дети» тӱнямбал конкурс нерген пален налын, Артём, Магдаоина, Степан икшывыже-влак дене таҥасымашыш ушнен. Газет ӱшанле да вучымо йолташышт гаяк лийын.
