Марий Турек район гыч Анатолий Волковым (снимкыште – йоча-влак дене) изи самолёт-влакым погымыжлан республикыште шукын палат. Изи годсек тӱрлӧ техникым рончен да угыч поген, тыгак тӱрлӧ арверым ыштен. Визымше классыште тунеммыж годымак пошкудыжо-влакын электроплиташтым да молымат ачален. Ялыште икымше телевизор лекмеке, пӱтынек рончен огыл гынат, «кутырышо яшлыкын» кузе пашам ыштымыжым умылен да кугые‰-влаклан антенным шындаш да кабельым шупшаш полшен.
Латкок ияшыже годым кидышкыже авиамоделирований нерген книга логалын. Тудым лудын лекмеке, пу да кагаз гыч икымше изи самолётым ыштен. Тунам нимогай пульт лийын огыл, туге гынат самолёт нӧлталалтын, икмыняр жап южыштат «кечен».
«Жап эртымеке, мый почто гоч материал-влакым заказатлаш тӱҥалынам. Йӱран игече годым мӧҥгыштӧ йокрокланаш жап лийын огыл, самолёт, изи пуш, юж кишке-влакын модельыштым шке гыч шонен келыштаренам. Вара йолташ-влак дене пырля самолёт-влакым южыш колтенна. А пушем-влак э‰ерыште ийыныт», – шарналта Анатолий Семёнович.
А.Волков шочмо ялжым кайык чо‰ештылме кӱкшыт гыч ужаш ятыр жап шонен коштын. Видеокамерым, автопилотан видеопередатчикым (спутник гоч виктараш лиеш) налын. Шонымашыже шукталтын – эсогыл кум тӱжем утла метр гыч ялжым ужын.
Эше ик йӧратыме пашаже – вӱд йымалысе илышым видеош войзаш. Пульт полшымо дене саде самолёт-влакым, вӱд пурымо деч аралыше яшлыкыш пыштен, 15 метр келгытыш «пурта». Шкежат, маскым чиен, вӱд йымаке пура. Садлан кол-влакын кушто илымыштым сайын пала.
Кызыт Марий Турек школ пеленысе «Умелые руки» авиамоделирований кружокым вуйлата. Мастарлыкшым самырык тукымлан пуа, йӧратыме пашажлан ӱдыр-рвезе-влакым шӱмаҥда. 2-7-ше класслаште тунемше 20 утла икшыве коштеш.
