Российын тӱрлӧкундемже гыч толшо 15 профессионал сӱретчым «Марий Эл в образах актуального искусства» всероссийский этнофутуризм пленэр иквереш ушен. Тудо «Культура» нацпроектын «Творческие люди» регионысо проектше кышкарыште 10 гыч 23 август марте эртаралтеш. Пленэр Марий Элын 100 ияш лӱмгечыжлан пӧлеклалтын. Мемнан республик гыч И.М.Ямбердов, И.В.Ефимов, С.В.Евдокимов, Г.Н.Петухов, А.А.Санникова ушненыт.
Марий калыкын тӱвыраже дене палыме лияш манын, участник-влак Морко районысо кок тӱрлӧ сӱан йӱлам, Республикысе курчак театрын шындыме «Йӱд орол» спектакльым онченыт, Шернур район гыч кидмастар Л.В.Веткина да карт В.М.Актуганов дене вашлийыныт, Козьмодемьянск оласе да Шернур посёлкысо музейлашке миеныт. Мастерскойышто пашам ышташ ятыр жап ойыралтеш. Пленэрым сӱрет ончер мучашла.
