28 ноябрьыште Йошкар-Оласе историй да археологий тоштерыште «VI Малые Евсеевские чтения» регион-влак кокласе шанче-практике конференций эртаралтын. Тушко Марий Элын тӱрлӧ районжо, Тюмень область Ишим ола гыч тунемше ден студент-шамыч ушненыт. Ӱдыр-рвезе-влак историйым палымыштым, пӱртӱсым тӱзатымыштым, калык тӱвыра деке лишке улмыштым шымлыме пашашт гоч каласкаленыт.
Йошкар-Оласе 6-шо номеран кыдалаш школышто тунемше Андрей Авдеев (снимкыште Т.Евсеев лӱмеш Калыкле тоштер вуйлатыше И.Г.Якаева дене пырля) «Природа. Экология» секцийыш ушнен. Тудо «Экологическое волонтёрство: вклад в восстановление лесов после пожара» пашам темлен. Рвезе кум ий жапыште 1500 наре пӱнчым шынден. Нунын кушмыштым эскерен. Конференцийыш ушнышо-влакым ты поро сомыллан кумылаҥ- ден. Пушеҥге озымым мландыш кералаш полшышо ӱзгар – рудол – дене палдарен. Андрей шке ийготан-влак коклаште 1-ше верым сеҥен налын.
Оля МАЙКОВА.
Авторын фотожо
Мыят тыгай лудмашке икымше гана ушненам. Авамын шочмо ялже нерген «Маленькая деревня – большие судьбы» шымлыме пашам ямдыленам. Мыйын вуйлатышем Валентина Николаевна Васильева лийын. Ӱдыр-рвезе-шамыч оҥай шымлыме пашам эртареныт. Тыгай конкурс шкем калык ончылно ӱшанлын кучаш туныкта, шымлаш кумылаҥда, у йолташ дене палыме лияш йӧным ышта. Конкурсышто кокымшо верым сеҥен налынам. Ончыкыжымат шымлыме пашаш ушнаш кумылем уло.
Ксения БОГОЛЮБОВА.
Морко, Коркатово.
