6-11 июльышто Йошкар-Олаште И.С.Палантай лӱмеш тӱвыра да сымыктыш колледжын Национальный сымыктыш гимназийыштыже илыш шолеш. Амалже – XVIII Российысе марий самырык тукым слёт. Тушко Марий Эл, Татарстан, Башкортостан, Удмурт республикла, Виче, Пермь, Тюмень кундемла гыч 80 наре ӱдыр-рвезе погынен.
-
Тӱҥ шонымаш шукталтеш
Марий самырык тукым слётыш мер паша деке кумылан, калыкын ончыкылыкшо верч тургыжланыше да тачысе кечыжым саемдаш тыршыше ӱдыр-рвезе-влак ий гыч ийыш погынат. Эртыкым шергалаш гын, кумдан палыме ятыр еҥ шке жапыштыже ты погарняш участник семын ушнен. А кызыт тӱвыра але кугыжаныш аланыште пашам ыштат. Тугеже слётын тӱҥ шонымашыже – калыкым ончыко вӱден кайыше еҥым куштымаш – тӱрыснек шукталтеш.
– Мер аланыште тыршаш ямде улшо, кугыжаныш кучем органыште пашам ышташ шонышо еҥ-влакым ямдылена. Слётын выпускникше-шамыч кызыт ты мероприятийын организаторжо радамыште улыт. Ятырын лӱмлӧ еҥ лийыныт. Ме тидын дене кугешнена, – палемдыш Марий Оньыжа Эдуард Васильевич Александров.
-
Тунемше еҥ ончыко кая
Арня наре жапыште слётын участникше-влак уш-акылыштым тӱрлӧ могырым пойдареныт. Марий Элыште вияҥше туризм, цифровой тӱняште марий йылмын верже нерген мутланеныт, демографий шотышто шинчымашым келгемденыт, проектым чын возаш тунемыныт. Мастер-класслаште кидпашалан шӱмаҥыныт, модмаште жапым веселан эртареныт, Йошкар-Олан сӧрал вержымат ончен савырненыт. Тале гармоньчо ден тӱмырзӧ-влак семӱзгарыштым чыла вере пелен налыныт. Ты кечылаште марий муро рӱдола мучко шергылтын, тывырдык кажне еҥын чонжым савырен
Юлия Ягодарова, Ямде лий» газетын юнкоржо, Марий самырык тукым слётын участникше, Советский район Кельмаксола гыч:
– Слёт нерген ончыч колынам ыле, тений ушнаш пиал шыргыжале. Тыште шуко ум пален налынам, икоян ӱдыр-рвезе-шамычым вашлийынам. Икымше кечынак мемнам ныл лужалан пайленыт. Кумшо лужаштем латкумытын улына.
Ӱмырашлык сай йолташ
Слётышто ылыжше пеҥгыде кыл ӱмыраш. Самырык еҥ-влак арня наре жапым пырля эртарыме годым ончыкылык нерген мутланеныт, изи тул воктене чоным почыныт, ум иквереш тунемыныт. Тыште вашлийме йолташ илышыште ӱшанле эҥертышыш савырна. Ӱдыр-рвезе-шамыч палыме лийыт да ешым чоҥат. Ты ой дене Оршанке район Кугунур школышто труд урокым туныктышо да директорын воспитаний шотышто советникше Елена Козлова тӱрыснек келша.
– Слётыш нылымше гана ушненам. Икымше гана 2023 ийыште Кужэҥер район Руш Шойышто лийынам. Тунам ятыр сай еҥым вашлийынам. Шернур район гыч Ольга Горохова дене кызытат кылым кучена. Йолташ ӱдырем мыйын семынак школышто пашам ышта, – каласыш Елена Семеновна.
Калыкым пагалыше, йӱлам жаплыше, шочмо марий йылме дене кутырышо самырык-влак Россий мучко ятырын улыт. Эн устаже, чолгаже Марий самырык тукым слётыш ушна. Ты погарня марий калыкын ончыкылыкшо волгыдо, пиалан лиеш манын ӱшаным шочыкта.
Оля МАЙКОВА.
Авторын фотожо-влак.
