Мария Осипова Медведево посёлкысо 3-шо номеран школышто 9-ше «А» кадет классым тунем пытарен. Физкультур, ОБЖ да алгебра предмет-влакым йӧрата. Шке ончыкылыкшым сарзе корно дене кылдынеже. Тидлан изинек ямдылалтеш. Спорт дене пеҥгыде кылым куча. Дзюдош коштын, таҥасымашлашке ушнен. Но эн чот куштылго атлетике келша. Куштылго атлетике дене Медведево районын первенствыштыже команде дене кокымшо верыш лектыныт. Цибикнурышто эртаралтше таҥасымаште Мария кумшо верым сеҥен налын. Тылеч посна музыклан шӱман. Сымыктыш школышто флейтым шокташ тунемеш. Туныктышыжо – О.В.Фищенко-Пулей. Мариям музык дене кылдалтше конкурс ден мероприятийлаште чӱчкыдын ужаш лиеш. Мутлан, Всемарийский йоча оркестрыште кок гана шоктен. Озаҥ олаште эртаралтше «Симфония талантов» конкурс гыч lll степенян лауреат лӱм дене пӧртылын. Чебоксарыште кумшо верым сеҥен налын.
– Спорт дене пеҥгыде кылым кучымаш ончыкылык профессийым ойырымаште кугун полша. Мыланем военный форман еҥ-влак изи годсек. А музык шӱм-чоным паремда, – ойла Мария.
Мария Осипова кызыт тергыме пашам куча. Руш йылме да математике деч посна биологий ден обществознаний предметлам ойырен налын. Тек тиде тургым ӱдырлан куаным веле конда.
