«Чылт артист улыт», – тыгай шомак дене ончышо-влак, совым рӱж кырен, «Первые роли» школ театр фестивальыш ушнышо йоча-шамычым вашлийыныт. 26 мартыште 32 уста коллектив шке мастарлыкшым рӱдолаште ончыктен.
Советский район Ӱшнӱр кыдалаш школын «Фабрика звёзд» кружокшо (снимкыште) «Аван мутшо шергакан» спектакльым ямдылен. Нуно 5-7-ше классла коклаште I степенян лауреат лийыныт.
– Репертуарышкына марий спектакль-шамычым пурташ тыршена. Ӱдыр-рвезе-влак шочмо йылмым йӧратен, пагален кушкышт, шонена. Ты коллектив дене тыгай кугу мероприятийыш икымше гана ушненна. Нуно театр тӱняшке але икымше ошкылым веле ыштат. А кружокнаже ынде ятыр ий уста тунемше-шамычым кушта. Теве М.Шкетан лӱмеш Марий национальный драме театрын артистше Светлана Скулкина (Александрова) тышечынак тӱҥалын. Моло-влакат ты аланыште вияҥаш тӱҥалыт манын шонена, – ойла Антонина Васильевна Васильева. Нуно Нина Петровна Викторова дене пырля кружокым вӱдат.
Звенигово район Поянсола тӱҥалтыш школын «Юные таланты» коллектившат фестивальыш марла шындыме постановкым конден. Йоча-шамыч «Телефон саман» спектакльым модын ончыктымышт дене 1-4-ше классла коклаште III степенян лауреат лийыныт. Кружок кокымшо ий пашам ышта. Тудым Лидия Аркадьевна Васильева вуйлата.
– Мый лу ияш Васян рольжым модам. Кызытсе саманыште шукын телефон деч огыт ойырло. Вашлийын мутланымашын, уремыште юарлен модмашын кӱлешлыкшым монденыт. Ме спектакльыште тидым ушештарена, – ойла тӱҥ рольым модшо Матвей Кадыков. Рвезе 4-ше классыште тунемеш.
Фестивальыште Гран-прим Йошкар-Оласе йоча да самырык-влакын усталык полат пеленысе «Встречая чудо» коллективше да Бауман лицейын «РЫЖИЙ КОТ» школ театрже налыныт.
Оля МАЙКОВА.
Авторын фотожо.
