Сеҥышыш лектын

Куд ияш Мария Бирюкова изинек шочмо йылмым йӧратен кушкеш. Тидлан тудым мӧҥгыштыжӧ кумылаҥдат. Вет ача ден аважат театрыште пашам ыштат, артист улыт. Марла почеламутым, мурым пырля тунемыт. Мария рӱдоласе 72-шо номеран «Солнышко» йочасадыш коштеш. Воспитатель-влак туштат тыгай койыш-шоктышлан шӱмаҥдат.

«Колумб лудмаш» оласе поэзий конкурслан ӱдырна тыршен ямдылалтын. Моло уста йочам ончен, чолгарак лийже манме шонымаш дене тиде пайремыш ушненна. Коваж ден кокаже марий тӱран тувырым урген пуэныт. Кумшо верым налмек, кумылжо эшеат кӱзен. Мария тений школышко кая, – ойла аваже, Марий Элын сулло артисткыже Алина Николаевна Егошина. – Йочасад дене чеверласыме пайремлан марий мурым ямдыленна.

Мариялан ончыкыжымат сеҥымашым тыланена.

З.ТИМОФЕЕВА.