18-20 августышто «Кеҥеж сылнымутчо-2023» сылнымут семинар Волжский район Руш Шайра ялысе каныме базыште эртаралтын. Тушко тӱрлӧ аланыште тыршыше да сылнымут дене пеҥгыде кылым кучышо кугыеҥ да школышто тунемше-влак (снимкыште) погыненыт. Икымше кечак кугу шарнымашым коден. Тудын девизше семын С.Чавайнын ушан ойжым налыныт: «Мемнан серышаш тулна шкенан калыкнам волгалтараш, тудлан ласка илышым ышташ полшаш шонымо гыч веле чӱкталт шоген». Икте-весе дене палыме лиймеке, этнопсихолог Нина Айварова «Уста еҥ могай?» теме дене лекцийым лудын. Кастене марий калык, тудын йӱлаже, тӱвыраж дене кылдалтше фильм-влакым онченна.
Кокымшо кечат пеш пайдале лийын. Культуролог, литературовед Ирина Садо-вина «Творчество на разных языках и между ними» теме дене мутланымашым эртарен. Марий Элын калык серызыже Зоя Дудина почеламутем-влакым терген да шонымашыжым каласен. Тудын сугыньжым шарнен, ончыкыжым кыртмен пашам ышташ тӱҥалам. М.Шкетан лӱмеш Марий национальный драме театрын артистше-влак пеш кугу пӧлекым ыштеныт. Мемнан дек «Наследие» программе дене вашкеныт. Тӱрлӧ модышышкышт мыят ушненам.
Пытартыш кечын кажне участниклан сертификатым кучыктеныт. Вара ме С.Ча-вайнын коштмо корныж дене экскурсийыш каенна. Сотнур, Петъял, Кугу Корамас ял-лаште лийынна. Кум кече пеш писын эртен каен. У йолташ-влак деч ойырлымат ок шу ыле. Вес ий марте «Уэш вашлиймешке» манын чеверласенна. Тау тыланет, «Кеҥеж сылнымутчо»!
Настя МИХАЙЛОВА.
Волжский, Кугу Корамас.
