– Науко тӱнямбалне улшо кугу йодыш-влаклан вашмутым муаш полша. Мыланем у шинчымашым налаш, тудым пеҥгыдемдаш йӧным пуа, – ойла 3-шо номеран Советский школын 9-ше классыштыже тунемше Виктория ПАВЛОВСКАЯ (снимкыште).
Вика 8-ше классыште тунеммыж годым «Кумыс и его целебные свойства» икымше шымлымаш пашам возен. Тиде паша дене «Будь здоровым – будь успешным!» республикысе конференцийыш ушнен да 7-11-ше класслаште тунемше-влак коклаште сеҥышыш лектын.
«Молан лач тиде темым ойыренат?» – йодым.
– Интернетыште имне шӧр нерген статьям лудмеке, мыланем оҥайын чучын: тудо чынжымак тазалыклан пайдале мо? Тидын нерген химий дене туныктышем Татьяна Ивановна Отмаховалан каласкаленам да пашалан пижынна, – вашештыш ӱдыр.
Виктория ончыкылык илышыжым медицине дене кылдаш шона. Ӱдырлан шонымашке шуаш тыланена.
