Эре ончылно

Моткоч тыматле, поро кумылан, шыма шинчаончалтышан активистке, отличнице Анна Алексеева (снимкыште) 1-ше номеран Морко школышто 10-шо классыште тунемеш. Кажне предмет дене келге шинчымашым налме верч чот тырша. Марий йылмым, тӱвырам, сылнымутым пагала, акла да сайын пала. Тидланже ача ден ава – Алексей Евгеньевич ден Эльвира Владимировна – кугу тӱткышым ойырат. Анна уш-акылжым конкурслаште, олимпиадылаште терга. Кугыжаныш марий йылме дене районысо олимпиадыште ий еда икымше верыш лектеш. Тений республикыште иктаҥашыже-влак коклаште кумшо лийын. Озаҥыште эртаралтше «Исследовательская конференция и чтения школьников на языках народов России» шанче-практике конференцийыште икымше верым сеҥен налын. Почеламутым сылнын лудмо конкурслаште – эре ончылно. Аннан кӱкшӧ сеҥымашке шумаште кугыжаныш марий йылмым туныктышо С.В.Никитинан надырже моткоч кугу.