Ме, «Ямде лий» газет редакцийын пашаеҥже-влак, Йошкар-Оласе Национальный сымыктыш гимназийыште уна лийынна. Эн ончыч 3-4-ше класслаште тунемше ӱдыр-рвезе-влак дене вашлиймашым эртаренна. Йоча-шамычлан газет илыш, юнкор паша нерген каласкаленна, Эчук да Пампалче дене палымым ыштенна, модыктенна. Ӱдыр-рвезе-влак чолгалыкышт дене ойыртемалтыныт. Кумшо классыште тунемше Глеб Пивоваров математике дене эн тале улмыжым палдарен. Тудо «Ямде лий» газетын мыняр ияш улмыжым эн писын шотлен. А нылымше классыште тунемше немыч ӱдыр Дина Нетцер мыланна почеламутым марла лудын. Тудо марий йылмым куанен тунемеш.
Умбакыже вашлиймашна визымше классыште шуйнен. Кыдалаш классыште тунемше-влаклан юнкор паша нерген пален налаш утларак оҥай лийын. Сандене мӧҥгысӧ пашамат пуэнна. Келшыше темым ойырен, йоча-влак заметкым возат манын ӱшанена.
