Карел Республик Петрозаводск оласе А.К.Глазунов лӱмеш кугыжаныш консерваторийыште «Шулдыр» фольклор ансамбль пашам ышта. Тушко Коми, Удмурт, Марий кундемла гыч ӱдыр-рвезе-влак чумыргеныт. Нуно тӱрлӧ калыкын тӱвыражым шымлат, карел, мордва, марий да моло йылме дене мурат, семӱзгар дене шоктат. Шукерте огыл Марий Элыш фольклор экспедиций дене толыныт.
– Муро, куштымаш гоч ме калык-влакын пайремышт, йӱлашт, тӱвырашт нерген пален налына. Тӱрлӧ семӱзгар дене шоктена. Экспедицийыш коштмына кугу пайдам конда. Ме кова-влакын мурыштым, семыштым возена. Тыге тошто семым арален кодена. Тиде ончыкылык пашаштына шӱкалтыш лиеш, шонем. Тунем лекмеке, шочмо верыш пӧртылнем да йоча-влак дене фольклор ансамбльым чумырынем. Ӱдыр-рвезе-влаклан финн-угор родо-тукымна нерген келгынрак палдарыме шуэш, – ойла Волжский район Руш Шайра ялын шочшыжо, «Шулдыр» ансамбльын еҥже Татьяна Васильева.