Кажне айдемын пӱрымашыже тӱрлӧ. Янлык ден вольыкынат тыгак. Уремыште шала коштшо, шужышо але эмганыше пырысым, пийым ужмеке, чон йӧсӧ дене тудым кидыш налын, шокшо помышыш ӧндалме да пукшымо шуэш. Теве Медведево район Кугу Шап ялыште верланыше «Конёк-горбунок» музей-фермыште кажне вольык да янлык неле пӱрымашан. Но поро кумылан, ныл йолан йолташ-влакым изинек йӧратыше М.В.Суворова кажныжлан кокымшо илышым пӧлеклен. 20 ий наре ончыч лишыл еҥже-шамычын полшымыт дене имне-влакым ончаш тӱҥалын. Кок ий ончыч пелашыж дене пырля Кугу Шапыште музей-фермым почыныт. Тушто имньым, тунам, шорыкым, казам, ирсӧснам, пинегым да кролик-шамычым ужаш лиеш. Вольыкым оза-влак шкешт кычалыт але, нунылан ӱшанен, иктаж-кӧ конден пуа, темлыме почешат налыт. Ончаш толшо-шамычым кугу верблюд ӧрыктара.
– Верблюдым, чома дене вашталтен, Ярославль кундем гыч конденна. Тудо шокшо велыште илыше янлык. Но мемнан фермыште улшо урлык 40 градус йӱштӧ ден 40 градус шокшо марте шкенжым сайын шижеш. Йӱдым верблюд моло семынак вӱташте ила, кечывал кечын чылашт дене пырля жапым уремыште эртара», – ойла Мария Владимировна. – Пелашем – мыйын тӱҥ эҥертышем, тудлан кугу таум ойлем.
«Конёк-горбунок» музей-фермым кучышын шонымашыже шуко. Тек чыла шукталтеш. А кумылан-влак, тушко миен, кажне чонаным ниялтен да пукшен кертыт.
