Ила гын, 4 мартыште Волжский район Сотнур школын туныктышо-ветеранже А.А.Сапаев 70 ийым тема ыле. Но ыле манын каласаш гына кодеш… Тудо ӱмыржӧ мучко Волжский районысо Ярамарий, Руш Шайра, Нурмучаш Шайра, Сотнур школлаште пашам ыштен. Марий йылме ден литературым, ИКН предметым туныктен. Йоча-влакым сылнымут пашалан кумылаҥден, юнкор кружокым вӱден. «Ямде лий», «Марий Эл», «Кугарня» газетла да «Ончыко», «Кече-Солнышко» журналла дене шкежат, юнкоржо-шамычат кылым кученыт. Нине савыктыш-влакым шаркалымаште кугу полышым пуэн. Анатолий Александрович тунемшыже-шамычым тӱрлӧ конкурсышко ушен. Почеламутым сылнын лудмо таҥасымаште чӱчкыдын сеҥыше радамыште лийыныт. Шкежат лудшо семын вийжым терген, ятыр гана ойыртемалтын. Сулен налме канышыш лекмекыжат, школ паша деч кораҥын огыл. Кугу Корамас, Сотнур школлаште «Сылнымут сескем» кружокым вӱден. Сотнур черке пеленысе Рушарня школышко йоча-влакым шӱмаҥден, чонышкышт порылыкым шыҥдарен. Тудын поро пашаже калык чонеш поро шарнымашым кода.
И.САПАЕВ.
Волжский район.
Фотом еш архив гыч налме.
