«Российская школьная весна» всероссийский фестиваль 28 апрель гыч 2 май марте Ставрополь олаште эртаралтын. Тудо Российын 79 регионжо гыч 1200 утла участникым иквереш чумырен. Нунын коклаште Марий Эл гыч Н.А.Заболоцкий лӱмеш кокымшо номеран Шернур кыдалаш школын «Грация» ансамбльже (снимкыште) лийын. «Шернур куштымаш» дене «Калык йӱлам аралымылан» спецприз дене палемдалтын. Башкортостан Республик Калтаса район Амчемучаш школышто тунемше Иван Петраев «Калык семӱзгар-влак, соло» таҥасыште I степенян лауреат лӱмым сулен налын.
