Марий Эл Республик мучко 254 школ уло. Нуно икте-весышт деч ойыртемалтыт гынат, кажныштыже тале туныктышо-влак тыршат. Медведево район Турша тӱҥ школыштат тыгай педагог-шамыч пашам ыштат. Валентина Ивановна Черепанова (снимкыште) 30 ий наре марий йылмым, литературым да ИКН-ым туныкта.
– Марий йылме ден литератур уроклан арняште пеш шагал шагат ойыралтын. Садлан йылмым келгын палыше йоча-влакын чотышт ий еда шагалемеш. Туге гынат тунемаш тыршат. Кумылаҥдаш тӱрлӧ йӧным кучылтам: модыктем, «Марла ойлаш тунемына» мульт-урок-шамычым ончыктем, школ тоштерыш коштыктем, – ойла туныктышо.
Марий йылме кабинетыште поян тоштерым келыштарыме. Экспонат-влакым погымаште ончычсо школ директор-влак Г.Н.Марычева ден В.В.Коротков тыршеныт. Умбакыже ты пашам В.И.Черепанова шуен. Кызыт тушто школ илыш, кундемын эртыкше нерген ятыр увер аралалтеш. Посна верым Кугу Ачамланде сарыште лийше талешке-шамычлан да СВО-што элым аралыше сарзыеҥ-влаклан ойырымо. «Марий вургемын, марий тӱрын вашталт толмыжо» ончер Медведево кундемысе тувыр ойыртем дене палдара.
Турша школын директоржо – Татьяна Михайловна Туманова. 1-9-ше класслаште 33 йоча шинчымашым пога. Школ илыш нерген директорын воспитаний паша шотышто алмаштышыже Ольга Анатольевна Рыбакова палдарыш:
— Йоча-шамыч «Движение Первых» толкынын чолга участникше улыт. Уш-акылыштым да вий-куатыштым тӱрлӧ конкурсышто тергат. Школышто кугу тӱткышым патриот пашалан ойырена. Маскироватлалтме сеткым пидына, окоплык сортам ямдылена, гуманитарный полышым погена. СВО-шко колтымо «Сеҥымаш полотном» шукерте огыл мӧҥгеш пӧртылтеныт. Тушан сарзыеҥ-влак кидпалыштым пыштен колтеныт. Йоча-шамыч тудым моткоч аклат.
Ты школышто руш йылмым да литературым 26 ий туныктышо Лилия Владимировна Иванова 2024 ий гыч эше директорын воспитаний шотышто советникше улеш. «Икшыве-влакым эн ондак шочмо йылмым палаш, тӱвырам аралаш, калык йӱлам шуктен илаш туныктыман. Тунам нуно шке республикым да Российым йӧратыше да аклыше еҥ лийыт. Мемнан ямдылыме «Йошкар-Олан сӧрал вер шӧржӧ» мемо модыш рӱдолам шымлымаште моткоч полша, – ойла Л.В.Иванова. – Йоча-шамычлан марий сынан пайремла пеш келшат. Тувырым чиен мурен-куштымашке кумылын ушнат».
Школыш пурымеке, ӧрыктарыше да куандарыше сӱретым вашлият. Омсам, теҥгыл-влакым, эсогыл Россий гербым пу гыч пӱчкеден ыштыме. Тиде верысе кидмастар-влакын, ончыч ты школышто пашам ыштыше-шамыч Л.А.Зайцевын да В.В.Коротковын, пашашт. Нуным коллегышт ден йоча-шамыч порын шарнат.
Оля МОШКИНА.
Авторын фотожо-влак
