Шыже — пӱртӱсын лыпланыме пагытше. Шижынат огына шукто — мландым ош лум леведеш, пӱртӱс шокшо пагыт марте омо тӱняшке кусна. Телым ласкан эртараш сайын ямдылалтман, пашам ыштыман.
Кызыт пасу ден пакчалаште эн шокшо тургым озалана. Морко район Шордӱр школышто тунемше-влак Даша Горшкова, Алина ден Михаил Кирилловмыт, Влада Плюшкина (снимкыште) школ пеленысе пакчам шошо годсек эскерат.
Школ пашаеҥ, туныктышо ден тунемше-влакын кажне кушкылым вич тылзе наре шыматен ончымышт поян лектышым пуэн. Йыраҥлаште пареҥге, ковышта, кешыр ден ушмен умен шочыныт. Шукерте огыл уло школ ик еш семын пареҥгым поген налын.
— Школ пелен пакчам кучымо чыла могырымат сай. Йоча-влак пӱртӱс дек шӱмаҥыт, пырляште пашам ышташ тунемыт. Мемнан школ пакчаште шошо годсек йоча йӱк-йӱан йоҥга. Кеҥежым кажне тунемше ик арня дежурствыш коштын: шӱкшудым кӱрын, вӱдым шавен, мландым пушкыдемден. Тыршымаш арам лийын огыл, лектыш куандарыше. Пакчасаска кочмыверыш кая. Тунемше-шамычлан пайдале да витаминлан поян сийым повар-влак ямдылат. Шке кид дене куштымо пакчасаска икмыняр пачаш тамлырак! Тидым йочажат, кугыеҥжат умыла, — ойла Морко районысо Шордӱр школ вуйлатыше Евгения Александровна Васильева.
Катя СЕРГЕЕВА.
Авторын фотожо.
