М.Шкетан лӱмеш Марий кугыжаныш драме театр 108-ше тургымым 27 августышто «Палантай» спектакль-концерт дене почын.
Артист-влак кеҥежым гастроль дене кушко миен коштыныт? У тургым могай премьер дене пойдаралтеш? Финн-угор театр-влакын «Майатул» фестивальыштым могай вашталтыш вуча? Театрын художественный вуйлатышыже Р.Ю.Алексеев, тӱҥ режиссёржо О.Г.Иркабаев, директорын алмаштышыже А.В.Анисимов (снимкыште), республикысе журналист да блогер-влак дене пресс-конференцийыште вашлийын, тиде да моло йодышлан вашмутым пуэныт.
– Тений кеҥежым Морко районышто, Шернур, У Торъял, Волжский округлаште «Кеҥеж йӱд» да «Кавасе алаша» постановко-шамычым ончыктенна. Вершӧр спектакльым сылнештен, тудым ойыртемалтшым ышташ полшен. Ме ончышо-влак деке чакрак лияш шонена, садлан тыге лектын коштмаш поро йӱлаш савырна манын ӱшанена. Тыгак Екатеринбургышто лийше «Коляда-plays» да Владикавказыште эртаралтше «Вахтангов. Путь домой» театр фестивальлашке ушнымына поро шарнымашым коден, – палемдыш Роман Юрьевич.
М.Шкетан лӱмеш театрын артистше-влакым Марий Элыште веле огыл, тора кундемлаштат йӧратат, уло кумылын вучат.
– 8-12 сентябрьыште Башкортостан Республикыш гастроль дене каена, «Ныл кувалан ик сӱан» спектакльым ончыкташ тӱҥалына. «Большие гастроли» федерал программе полшымо дене «Записки юного врача», «Богатырь из теста», «Микулан – презе, Якулан – ӱдыр», «Кавасе алаша» спектакль-шамычым Набережные Челны олаш наҥгаена, – палдарыш Алексей Валерьевич. Финн-угор театр-влакын
«Майатул» фестиваль-конференцийышт В.А.Пектеевым шарнымылан пӧлеклалтеш. Тудын шындыме «Югорно» ден «Окса тул» спектакль-влакым, тыгак «Кава пундашышке йолгорно» кином ончыктат. Киношто Василий Александрович режиссёр да сценарист веле огыл лийын, тӱҥ рольым модын. Тыгак фестивальыш Беларусьысо да Абхазийысе драмтеатрла гыч уна-влакым вучат.
У тургым премьерлан поян лиеш. Кызыт «Юлсер таҥго» ден «Кожла кокласе омо» спектакльлам ямдылат. У ийлан йоча-влакым «Снежная королева» постановко дене куан дараш сӧрат.
Оля МОШКИНА.
Авторын фотожо.
