Кугечым изижат, кугужат чон вургыж вучат. Пайрем йӱлам шотыш налын, сийым ямдылат. Ӱдыр-влак пайремын ик эн ойыртемалтше татше семын мом палемдат? Айста пален налына.
Ульяна ПЕТУХОВА (Килемар, Арде): «Ты кечын ме унала коштына. Вашлиялтше еҥ дене чевер муным вашталтена. А нуныжо могай мотор улыт! Ме муным кевытыште налме чия дене чиялтена, наклейкым пижыктена. Ковам гын, шоган шӱман вӱдыш пышта».
Софья СЕНЬКИНА (Морко, Октябрьский): «Кугече – йӧратыме пайремем. Черкыш йӱдымсӧ службыш кошташ келша. Ме, Октябрьский рушарня школын тунемшыже-влак, Арыныш выступатлаш каена. Мӧҥгыштӧ куличым , муным кочкына. Тений торык пасхым ышташ шонем. Еш дене ты кечын пӱртӱс лоҥгашке лектына».
Евдокия СОКОЛОВА (Медведево, Шойбулак) : «Ты пайрем ешым, родо-влакым ик ӱстел йыр пога. Мый эн чот кресавамым вучем. Ме пырля кочкышым ямдылена, шер теммеш мутланена, кечым веселан эртарена».
Оля МАЙКОВА ямдылен.
