Уста да у шинчымашым налаш шонышо ӱдыр-рвезе-влакым «Сириус» тунемме рӱдер лу ий утла иквереш чумыра. Теве 2-шо номеран Шернур школышто 9-ше классыште тунемше Полина Михайловат нунын коклаште лийын. 1-23 мартыште тудо «Основы росписи и декорирования художественной керамики» программе почеш тунемын.
– Мый изинек сӱретлаш йӧратем. Но шун дене пашам ышташ але марте логалын огыл ыле. Тыгай йӧн улмым пален налмеке, тиде сомылланат тунемаш кумыл лектын. Конкурсым эртымеке, мыланем «Сириус» гыч ӱжмашым колтеныт, – ойла Полина.
Тӱрлӧ регион гыч 16 йоча ты программе почеш шинчымашыжым пойдарен. Нуно уроклаште керамике дене пашам ышташ тунемыныт. Шун гыч сылне ӱзгарым ненченыт.
– «Сириусышко» логалмемлан мый моткоч йывыртенам. Тушто кугу опытан туныктышо-влак келге шинчымашым пуат. Шке семын пашам ышташ кумылаҥден моштат. Но тыгодым пайдале каҥаш дене полшат. Йоҥылышым шекланен шуктен, тунамак тӧрлаш йӧным пуат, – палдара ӱдыр.
Полина у шинчымашым налаш кумылан. Ончылий «Артек» тӱнямбал рӱдерыште сӱретлыме мастарлыкшым вияҥден. Тыгак Шернур посёлкысо Йоча сымыктыш школым тунем лектын. Усталык конкурслаште эре сеҥыше-влак радамыште лийын.
Йоча-влак, у вашлиймаш дене пойдаралтше шарнымашым шкаланда пӧлеклаш вашкыза. Кызытсе жапыште тидлан тӱрлӧ йӧн уло, лач кумыл веле лийже.
Катя СЕРГЕЕВА ямдылен.
Фотом еш архив гыч налме.
