Медведево районысо Лӱльпан рӱдерыште тулык да ача-ава попечений деч посна кодшо 35 йоча ила. Кокытын йочасадыш коштыт. Молыжо верысе школышто 1-9-ше класслаште тунемыт. Шукерте огыл тушто лийынна. Ӱдыр-рвезе-влакын илыш-йӱлашт дене рӱдер вуйлатыше Н.С.Петухова палдарен, экскурсийым эртарен. Тудо ты тӧнежыште 43 ий пашам ышта, 2019 ий гыч вуйлатышын сомылжым шукта.
– Йоча-влак поро да уста улыт. Воспитательшамычым «ача-ава» маныт. Тыгай койыш икшыве ден кугыеҥ-влак кокласе пеҥгыде вашкыл улмылан кӧра лиеш. Йоча-шамыч дене мутланен моштыман. Нуным йӧратыман да умылыман, – ойла Надежда Северьяновна. – Икоян коллективышкына воспитатель, психолог да вес пашаеҥ-влакым уло кумылын вучена.
Ӱдыр-рвезе-влакын илыме верышт чатка. Спорт дене кылым кучышо-шамычлан тренажёр залым келыштарыме. Нунын сеҥымашыштым ятыр грамот, медаль да кубок пеҥгыдемдат. Кидпашалан кумылан-влаклан ургымо мастерской уло. Тушто нуно тӱрлаш, пидаш, ургаш тунемыт. Икшыве-шамычлан усталык мастерскойышто жапым эртараш келша. Мутлан, Илья Д. (снимкыште) кинусайга технике деке кумылаҥын. Виктория С. (снимкыште) сӱретлаш йӧрата. «Сӱретлыме годым чон дене канем. Пашамын кажне ужашыже ойыртемалтше лийже манын, тӱрлӧ тӱсым кучылтам», – манеш Виктория.
Оля МАЙКОВА.
Авторын да рӱдерын архивше гыч налме фото-влак
