Гармоньчо лияш кажнылан пӱралтын огыл. Мастарлык деч посна айдемын эше юзо вийже лийшаш. Тунам гына чоным тарватыше яндар да волгыдо сем шочеш. А самырык гармоньчо-влакым калыкын поянлыкшылан шотлыман. Лач нине чолга шӱдыр-шамыч 15 мартыште «Изи гармоньчо» регион-влак кокласе конкурсышто шке мастарлыкыштым ончыктеныт. Таҥасымашым Марий тӱвыра рӱдер Йошкар-Олаште эртарен.
Тушко Марий Эл, Татарстан да Башкортостан республикла гыч 9-17 ияш 23 самырык гармоньчо да вич еш ансамбль ушненыт. Участник-влакын калык ончылно шкем кучен моштымыштым, семым келыштарен йоҥгалтарымыштым жюри аклен. Тӱрлӧ кундемын семже, кумдан палыме муро-влак шонаш таратеныт але тавалтен колташ кумылаҥденыт. Самырык гармоньчо-шамыч шукышт шке гыч семӱзгарым шокташ тунемыныт. Южыжым ачажын але кочажын мастарлыкше таратен.
«А ӱдыр гармоньчо-влак лийыныт мо?» – тыгай йодыш шочеш, очыни, лудшо еҥын. Лийын! Звенигово район Кожласола сымыктыш школын тунемшыже, «Ончыкылык ӱшан» ансамбльын участницыже Дарья Дитарова шинчалан вигак пернен. Тудо кугезе кочажын пашажым умбакыже шуя. А гармоньжо могай! Вигак шижалтеш: ӱдыр тудым йӧрата да шкаланже келшышын сӧрастарен.
Конкурсын сеҥышыже-влак дене гала-концертыште палдареныт. Тудо В.Ленин лӱмеш тӱвыра полатыште эртаралтын. Гармоньчо солист-влак коклаште Гран-при дене Ростислав Васинкин (Марий Турек, Арбор тӱвыра пӧрт) палемдалтын. Тудлан у гармоньым кучыктеныт. Ансамбль-шамыч коклаште Яранцевмыт ешын семӱзгар ансамбльже (Волжский, Памар тӱвыра пӧрт) Гран-прим сеҥен налын. Ешлан акустический колонкым пӧлекленыт.
Нине уста ӱдыр-рвезе-влак кумылдам савыреныт гын, теат мурсем тӱняшке ушныза. Келшыше семӱзгар полшымо дене шӱм-чонда гыч шолын лекше сылне сем дене тӱням куандарыза!
Е.СЕРГЕЕВА.
Снимкыште: кодшо ийын гран-прим налше Иван Петраев ден тений сеҥыше Ростислав Васинкин.
Авторын фотожо.
