Кеҥеж жапыште велосипед шуко еҥын транспортышкыжо савырна. Тыгодым тошкымо оравам шолышташ шонышо-влакат ешаралтыт. Марий Эл Республикысе элгӧргӧ паша министерствын пресс-службыжо калыкым тӱткырак лияш ӱжеш. Велосипедым йомдараш огыл манын, икмыняр ой-каҥашым темла.
- Тӱҥ правил – велосипед оза деч посна кодшаш огыл. Ик-кок минутлан веле ӧрдыжыш кораҥыда гынат, велосипедым лӱмын келыштарыме кӧгӧн дене тӱкылыман. Кӧгӧнын тросшо кӱжгӱ да пеҥгыде лийшаш. Тошкымо оравам кужу жаплан кодымо годым лӱмын келыштарыме сигнализацийым ешарыман. Йӧн уло гын, видеокамер логалме верыш шогалтыман.
- Насосым, понарым, велокомпьютерым да моло арверым пелен налман. Шичме верым рончен налаш лиеш гын, кораҥдыман. Шарныза, подъезд тӱкылалтеш гынат, велосипедым аралаш келшен ок тол.
- Велосипед рамеш але орваш ӱштылалтдыме чия дене тӱрлӧ знакым сӱретлыман.
- Велосипедым шолыштыныт гын, полицийыш 102 але МВД-ш 68-00-00 телефон номерла дене йыҥгыртыман. Полицийыш йодмашым пуымо годым велосипедын документшым ончыктыман. Фотом (уло гын) кодыман, ойыртемалтше пале нерген ойлыман.
- Йоча-влак, шарныза: еҥын погыжым йодде налмаш шолыштмашлан шотлалтеш. Тидлан закон ончылно мутым кучыман: штрафым тӱлыктат але эрык деч посна кодат.
