Шыже каникул годым «Всем кого касается» спектакльым онченам. Тудым Уфа оласе Самырык театрын артистше-влак ончыктеныт. Спектакль моткоч оҥай, шонаш таратыше, школ илыш нерген. Тӱҥ герой – мутланен кертдыме рвезе, Костя. Черле улмыжлан кӧра, тудым йоча-влак огыт йӧрате. Шольыжлан полшаш манын Миша изаже дене пырля тунемаш кая. Нуно шуко школым вашталтат, но кажне вере нуным торжан вашлийыт. Молан манаш гын, Костя ден Миша молылан палыдыме йылме дене кутырат. Иза-шольо чыла нелылыкым пырля сеҥат. Варажым тунемше-влак йоҥылышыштым умылат да кид дене ончыктен мутланыме йылмым тунемаш кумылышт лектеш. Мыйын шонымаште, чыла айдеме тӧр праван. Полыш кидым шуялташ нигунам ӧрман огыл.
Анастасия ИВАНОВА.
Морко, Коркатово.
