«Одоким кечын чывылан йӱштылаш ситыше вӱд уло – шошо вашке толеш», – коча-кована-влак, пӱртӱсым эскерен, тыгай калык палым ойленыт. Ты кечын, 14 мартыште, ночко ыле. Шошо толмо шижалтешак: кече кужемеш, игече шокшемеш, лум койын шула. Кундемышкына шокшо элла гыч тӱрлӧ кайык пӧртылаш тӱҥалын.
Морко район Нуж-Ключ школышто тунемше-шамыч шырчыкым моткоч вучат.
– Шулдыран йолташна-влакым вашлияш ямде улына. Шукерте огыл труд урокышто туныктышына Валериян Александрович Матвеев дене пырля оҥам пужаренна, йыгенна, чӧгыт дене пудам перкаленна. Тыге 10 мотор шырчык омартам ыштенна да школ кудывечысе пушеҥгылаш вераҥденна. Ынде шырчык-влакын толмыштым да илаш пурымыштым вучена. У суртышт воктене укш гыч укшыш юарлен чоҥештылмыштым куанен эскераш тӱҥалына,– ойла 8-ше классыште шинчымашым погышо Елена Семёнова.
Тунемше-шамыч шырчыклан йӧнан омартам келыштареныт. Кугу кайык пурен ынже керт манын, вишым изин пӱчкыныт. Пырыс але вес тушман деч аралаш шонен, «пӧртым» кӱшкырак сакеныт. Каналташ шинчаш келшыше тоя нергенат монден огытыл. Вашке шулдыран йолташ-влак нунылан сылне мурышт дене тауштат.
Оля МАЙКОВА.
Фото-влакым школ архив гыч налме.
