«Шошо кече ондала», «Шошо кече шым тӱсан», – маныт калыкыште. Икшыве ынже черлане манын, кузе чиктыман?
- Вургемым ковыштала чийыман: футболкым, водолазкым, вичкыж джемперым але жакетым. Шокшо гын, кудашаш лиеш. Куртко мардежым колтышаш огыл.
- Куржталаш, утыждене тарванылаш йӧратыше икшыве-влаклан хлопокан вургемым ойырыман. Тудлан аллергий огеш лий. Коваште шӱла.
- Пиж але перчатке шокшо, но вичкыж лийшаш. Флис, полиэстер, хлопок гыч келшен толыт.
- Юалге але йӱран игечыште шӱштӧ гыч ургымо шокшо ботинке келша. Левырак годым флис кӧрган резинке кемым чийыман. Пундашыже куштылго, лывырге лийшаш, яклештшаш огыл.
- Вуйчием шокшо лийшаш, но пӱжалтарышаш огыл. Юалге игече годым трикотаж, вискозо, полиакрилонитрил калпакым чийыман. Шлем, труба форман вуйчиемым налаш лиеш. Нуно саҥгам, пылышым, логарым аралат. Упш вуй дек пижын шогышаш.