Ила ыле гын, йоча серызе, «Ямде лий» газетын 1991-1997 ийласе редакторжо В.В.Крылов таче, 4 майыште, 70 ийым тема ыле. Морко район Арын школышто Василий Васильевичым шарныме лӱмеш поэзий, муро да сӱрет конкурс эртаралтын. Тушко республикысе тӱрлӧ школ гыч уста ӱдыр-рвезе-влак ушненыт. Пайремышке Шулдыр Васлийын родо-тукымжо, пелашыже, пырля пашам ыштыше йолташыже-влак толыныт.
Конкурсым Арын школын директоржо Е.И.Семенов почын да В.В.Крыловым порын шарналтен:
– Василий Крылов школышко чӱчкыдын толын. Клубышко кугу программе дене вашкен, йолташыже-влак дене концертым ончыктеныт. Пеш весела лийын, мыскарам ышташ йӧратен. Василий Васильевич мемнан школышто тунемын. Тудын дене моткоч кугешнена.
Шулдыр Васлийын «Йӧсӧ мо саламлалташ?», «Марий семӱзгар», «Театр», «У костюмын пӱрымашыже» почеламутшо-влак, «Роза-Розмари» мурыжо ик-мыняр гана йоҥгеныт. Нуно поснак йӧратыме улыт.
Ойыртемалтше-шамычым пайрем мучаште саламленыт. «Сылнымут» таҥасыште Морко район Эҥерсола школ гыч Мария Николаева да 6-шо номеран Морко школ гыч Александр Цветников шке ийготан ӱдыр-рвезе-влак коклаште сеҥышыш лектыныт. «Муро» номинацийыште Волжский район Кугу Корамас школ гыч Мария Бирюкова, Морко район Арын школын 2-шо да 8-ше класслаштыже тунемше-влак ойыртемалтыныт. Морко район Унчо школ гыч Антон Иванов прозым лудмыж дене посна палемдалтын. «Самырык сӱретче» номинацийыште Морко район Кульбаш школ гыч Альмир Файдрахманов, Кожлаер школ гыч Анастасия Кудряшова, Унчо школ гыч Марина Оразаева, Купсола школ гыч Вероника Бекешева, Волжский район Кугу Корамас школ гыч Антон Сидоров сеҥышыш лектыныт. Шулдыр Васлийым мыняр шарнена, калыкыште тунар илаш тӱҥалеш.
