Морко район Унчо кыдалаш школышто Шлань, Шӱргӧ, Паймыр, Ямбатыр, Муканай, Шап Унчо ялла, Уньжинский посёлко да Унчо села гыч 192 йоча тунемеш. Директорлан А.С.Григорьев ышта. 26 еҥан туныктышо коллектив икшыве-шамычлан ешартыш шинчымашым пуымо шотышто кӱлын тырша. Школышто кумло утла кружок уло. Иктыже – «Юные лесоводы». Тушко 5-11 классла гыч 36 тунемше коштеш. Кружокым географий ден обществознаний предмет-влакым туныктышо З.К.Митрофанова кумшо ий вуйлата.
– Зульфия Камильевна, «Юные лесоводы» кружок тунемше-влаклан мо дене полша?
– Теорий да практике занятийлаште йоча-шамыч шуко ум пален налыт. Йодыш лекме годым пӱртӱсышкак вашмутым кычалаш миен толына. Икшыве-влаклан чодыраште мыняр тӱрлӧ кушкыл, пушеҥге кушкыт да могай кайык-влак илат пален налаш кеч-кунамат оҥай да пайдале. Чодыраш кеч-могай пагытыште лектына. Практикым, шымлыме пашам да опытым эртараш Уньжинский лесничествыште участкына уло. Лесничий Э.В.Егоров, мемнан кураторна, полшаш эре ямде.
– Тунемше-шамычын чолгалыкышт кузерак палдырна?
– Ӱдыр-рвезе-влак тений кисалан, шырчыклан 70 омартам ямдыленыт. Чодыра кумдыкышто арулыкым эскерена. «Покормите птиц зимой», «Собери макулатуру – спаси дерево» да моло акцийыш ушнена. Проект да шымлыме пашам ышташ тыршена. «Лучшее мероприятие школьных лесничеств» конкурсышто ӱмаште икымше верым налме. «Это всё моё, родное» республикысе конкурс оҥайын да веселан эртен.Таҥасымаште икымше верыш лектынна. Мемнам чодыра тоштерыш, оранжерейыш да Юлтехыш экскурсийыш ӱжыныт. «Сохраним лес от пожара» сӱрет конкурсышто жюри Кристина Васинкина ден Марья Оразаеван пашаштым кӱкшын аклен.Ӱмаште Алеся Григорьева, Кристина Ильина, Марья Оразаева, Дина Павлова Виче кундемыште эртыше слётышто республикын чапшым араленыт да сеҥымаш дене куандареныт. Ӱдыр-влак Шап ер воктене эртаралтше регион-влак кокласе слётышто лийыныт. Марья «Лучший лесопатолог» конкурсышто 1-ше верым налын.
Чодыра – марий калыкын ик эн кугу поянлыкше. Ончыкыжым Унчо школын тунемшыже-влак кокла гыч чодыра озанлыкыште тыршыше пашаеҥ-шамыч лийыт манын, ӱшан уло.
З.ТИМОФЕЕВА.
