Морко посёлкышто илыше Цветниковмыт ешыште кок икшыве шочмо йылмым изинек йӧратен кушкеш. Тидлан авашт, Ирина Юрьевна, шӱмаҥда. Шкежат марий мероприятийлашке кумылын ушна. Поэзий пайремлаштат тудым чӱчкыдын ужаш лиеш.
Саша 6-шо номеран Морко школышто 6-шо классыште тунемеш. Йочасадыш коштмыж годымак почеламутым марла сылнын лудмо конкурслаште таҥасен. Грамот ден дипломжат ятыр.
Кызыт тудым тӱрло пайремыште участвоватлаш йодыт. Морко районлан 100 ий темме лӱмеш Йошкар-Олаште эртаралтше концертыште Алексей Январёвын «Мондаш ок лий» почеламутшым сылнын лудын. 2-шо классыште тунемше Мария, изажын тыршымыжым ужын, таҥасымашлашке ушна.
– Шочмо йылме ава гай. Эн лишыл, шыма. Тудым мондышаш огынал. Шочшына-влак дене марла кутырена да шинчымашнам, мастарлыкнам мероприятийлаште тергена, – ойла И.Ю.Цветникова.
З.ТИМОФЕЕВА.
