Республикыште тӱрлӧ школышто тунемше-шамыч шымлыме пашашт дене «Край родной марийский» краеведений конференцийыш ий еда ушнат. Тудым Йошкар-Оласе «Роза ветров» йоча да самырык-влак рӱдер эртара. Тений конференций Кугу Ачамланде сарыште Сеҥымашлан 80 ий теммылан пӧлеклалтын. Курыкмарий, Волжский, У Торъял, Кужэҥер, Морко, Килемар районла, Йошкар-Ола да Волжск ола гыч 24 пашам жюри аклен. Конференций Йошкар-Оласе «Герои Отечества» музейно-патриотический рӱдерыште эртаралтын. Кум таҥасыште сеҥыше-шамычым палемденыт. Тӱрлӧ номинацийыште икымше верым сеҥен налыныт: Никита Мачайкин (Волжский, Шарача), Виктория Щербакова (Кужэҥер, Шӱдымарий), Мария Дмитриева, Дарья Абатнина («Роза ветров» рӱдер).
Тунемше-влакын шымлыме пашашт эртыме корным шарнаш да чын аклаш полшат.
Людмила ГРИГОРЬЕВА ямдылен.
Снимкыште: Никита Мачайкин – туныктышыжо М.М.Михайлова дене пырля.
Фотом школ архив гыч налме.
