22-26 апрельыште Ставропольышто «Российская школьная весна» III всероссийский фестиваль эртаралтын. Тушто 1500 талантан ӱдыр-рвезе мастарлыкшым ончыктен. Марий Элын чапшым 2-шо номеран Шернур кыдалаш школышто тунемше Злата Васильева ден Шернур район Казанский школышто шинчымашым погышо Вероника Петухова араленыт. Злата «Ужар чодыран мландем» мурым сылнын йоҥгалтарымыжлан «Эстрадное пение» таҥасыште «Специальный приз» дене палемдалтын.
Ӱдыр тӱрлӧ конкурсышто мастарлыкшым терга. Школ пеленысе «Мечта» ансамбль дене «Орлёнок» йоча рӱдерыш хор да вокал коллектив кокласе таҥасымашке миен. Москошто эртаралтше «Юнармия культуры» конкурсышто лийын. Тудо кум ияш гычак мура. Шернур посёлкысо И.Н.Молотов лӱмеш йоча сымыктыш школым йошкар диплом дене тунем пытарен.
– Фестиваль моткоч келшен. Вуйлатышем Светлана Николаевна Иванова эре пеленем лийын да тургыжланымем лыпландараш полшен, – ойла Злата. – Кугу конкурслашке ушнаш кумылда уло гын, чолга лийза. «Движение Первых» толкын тӱрлӧ мероприятий нерген увертара, ушнаш ида ӧр.
Оля МАЙКОВА.
Фотом еш альбом гыч налме.
